امتى بس امتى يا ريسنا يا والى مصر المحروسه

ليه لحد دلوقتى مش عايز تاخد قرار ضد اسرائيل . ليه لحد دلوقتى مش عايز تقطع العلاقات . ليه لحد دلوقتى مش عايز تقطع الغاز . كنت بتتحجج قبل كده بالمعونة الأمريكية اللى هيا 8 مليار . وكنا فاكرين ان هيا دى اللى معيشة مصر . طلع ان الغاز المصرى اللى بيروح اسرائيل بيكلف مصر 28 مليار . يعنى أكثر من ثلاث أضعاف المعونة .ليه كمان مش قادر تنظر فى اتفاقية كامب ديفيد . مش أرض سيناء دى أرض مصرية . ولا الجنود اللى ماتو فيها مالهومشى ثمن .
يعنى مش كفاية ضحايا الطائرة المصرية اللى ضربتها اسرائيل والإعدام الجماعى للأسرى المصريين . وضحايا قطار الصعيد . وضحايا العبارة . كل ده راح ببلاش .

لا يا ريس الدم المصرى مش رخيص .

وإذا كان شعب مصر نايم دلوقتى . أحب أقولك إن الوضع ده مش هيستمر كتير .

إنت عارف ومتأكد إن شعب مصر . شعب عظيم . قاهر الهكسوس والصليبيين والتتار والإنجليز . وكل ظالم .
بركان الغضب هيثور . وساعتها مفيش حاجة هترحم أى ظالم .
ودورنا إحنا . لازم نفوق . مش عايزين ناخد على أن دمنا رخيص . مش عايزين ناخد على شكل الضحايا ونسكت . لما سكتنا على الطيارة وإعدام الأسرى المصريين . راح دم الكتير ببلاش .

واللى بيقول إن احنا مش قد اسرائيل بنا كلامه ده على أى أساس . كانت مصر قد العدوان الثلاثى لما عبد الناصر أمم القناة . كانت مصر قد بناء السد العالى والمصانع والإصلاح الزراعى أيام الراحل عبد الناصر . كانت مصر قد إسرائيل فى 73 أيام عزها وخط بارليف وغيره . كانت مصر قد التتار وهيا من غير حاكم .

مصر طول تاريخها عظيمة . وسيناء لازم تتعمر . ويتبنى بها جيش يحمى حدودها .

أنا عايز أسأل سؤال وحد يجاوبنى :
لو إسرائيل دخلت تضرب سيناء . كامب ديفيد هتحمينا . الأمم المتحدة هتحمينا ؟

واللى بيقول إن جيش مصر مصر ضعيف . ممكن يجاوب :
كانت الحكومة بتعمل إيه لمدة 36 سنة ؟
عبد الناصر والسادات بنوا الجيش فى 6 سنوات .

عارفين يا جماعة إسرائيل بتقول ايه على سيناء .
الأرض المتنازع عليها .

إزااااااااااى . إزااااااااااااى . إزااااااااااى

أمال فين سيادة مصر على أرضها ؟

يا ريس . إنت قول بس . هنفسخ كامب ديفيد وهنزل جيش مصرى فى سيناء وهنقطع الغاز عن إسرائيل . وهنقطع كل العلاقات معها .
صدقنى هتلاقى 80 مليون مصرى وراك . هينسوا الجوع والفقر . وهيكونوا مستعدون للموت فى سبيل الله والوطن . فى سبيل كل حبة رمل من أرض مصر .

إحنا مش أقل من شعب غزة .
يا ريس . شعب مصر مش جباااان .

ودى مش شعارات . دى الحقيقة . والتاريخ كله بيصدق على كلامى . ولو مش مصدق إعمل إستفتاء . وسيب الشعب يعبر عن الضغط اللى جواه .

اللى موافق على كلامى ما يقرأشى ويمشى . عايزين الكل يعبر عن رأيه .

واللى عنده رأى تانى يتفضل يقوله .