بلد شهادات صحيح !!!!

بلد شهادات صحيح




نبدأ كلامنا بالصلاة على الحبيب..... سيدنا محمد نور البرية
اللى قال وكلامه يطيب...... العلماء ورثة أنبياء البشرية
والعلماء منهم المهندس والطبيب.... ومنهم طلاب الثانوية
والله ما بأتريق...... ده كلام صح مية المية
هو المعلم والدكتور..... وحتى الشاعر الحبيب
طلعوا من فين 000 غير من طلاب الثانوية
يعنى الثانوية كانت زمان.... حلم يخلى القلب يطيب
كانت حلم وأمل 000 وكمان أمنية
لكن دلوقتى.... أصبحت نكد وقرف
فلوس ووسايط .....ودروس خصوصية
واللى بينجح فيها دلوقتى..... مش اللى بيتعب ويذاكر
اللى بينجح فيها دلوقتى.... اللى معاه واسطة قوية
واللى معهوش واسطة...... ما بيشلش هم دلوقتى
كلها مخدة وبطانية........ لأعضاء اللجنة الرقابية
ح يحلوا لك المشكلة ......وتلاقى ورقة الإجابة قبل ورقة الأسئة
وكمان0000000 بأجاباتها النموذجية
طبعاً00 هو أحنا برضه مش فى عصر الحرية
يعنى أكتب الأسئلة...... والإجابة من المراقب هدية
ودى خدمة من عضو مجلس الشعب
اللى أبنه فى المدرسة الثانوية
هو المسئولين برضه..... مش فى خدمة الشعب
علشان كده تلاقيهم فى ولايم اللحمة 00ممثلين عن الشعب
وكتر ألف خيرهم00 سابوا للشعب الفول والطعمية
ده بأعتبار أن الشعب أصلا.... بيلاقى الفول والطعمية
بس لما بتضيق بيهم00 ممكن يأخدوا الفول والطعمية
وكمان بالمرة الطبق ....وكمان بالمرة الطبلية
طبعا خايفين على الشعب..... لسه ح يهضم ولسه ح يأكل
ما يعيش جعان ويموت جعان
وبكده يقل العدد .....وتمشى عجلة التنمية
والله المسئول ده كتر خيره..... ده أحنا قرفينه من بدرى
بيخاف على صحتنا وعلى مصالحنا...... تلاقيه دايماً يجرى
من شرم لمارينا..... يا رب أكسيهم وعرينا
آديهم طولة العمر .......وموتنا أحنا بدرى
أصل بصراحة 000 الواحد مل من حياتنا الجميلة
ومل من مصر الديمقراطية
مل من تصريحات مسئولينا الوردية
كل حاجة فى مصر موجودة وجميلة
من أول رغيف العيش...... وحتى أمتحانات الثانوية
ولو مش مصدقنى.... روح على أى رصيف
وقول00 أنا عايز أمتحانات الثانوية
ح تلاقى الأمتحان .......وبالأجابة النموذجية
وكمان لو عايز..... عليه أتنين مراقبين هدية
وكل ده مش ح يكلفك غير..... خمسة جنيه مصرية
خمسة جنيه00ويتساوى الطالب الفاشل مع الطالب الدحيح
مش بأقول لك00 مصر بلد شهادات صحيح